經典茶餐廳

中午放工後帶菇菇見識傳說中的 "澳洲牛奶公司", 到達時人龍大約有二十人, 不用五分鐘便有位, 等位時已經諗定所有食物 option, 免得被伙記問到口啞啞。

全場伙記都身手敏捷兼效率奇高, 落單才兩秒, 食物經已奉上, 由於被安排坐在最左手邊的面壁自閉位, 伙記們經常探頭窺看我們的一舉一動, 其中一次不慎跟目露兇光的伙記有眼神接觸, 他便惡巴巴的吼我:「做乜嘢!!」我和菇菇齊聲回應:「無嘢!!」講完自己都忍唔住笑。

後 join 的 KM, 雖然幫襯過好幾次, 但反應依然唔夠快, 依舊被伙記嚇到語窒, 請緊記以下問題的前後次序:

「多士定麵包?」
「炒蛋定煎蛋?」
「意粉定通粉?」
(P.S. 食完火腿蛋就好諗定要咩餐飲嘞!!)

有人會覺得此茶餐廳沒啥特別, 而且服務差勁, 但我卻非常喜愛其出品的鬆厚牛油多和炒到八成熟的雞蛋, 亦很欣賞伙記們的獨特 service。