Cheer Up

聽日就係 7 月 1 號, 話咁快就過咗半年。人愈大, 愈覺得時間過得好快, 好懷念讀書時代添...

又要迎接最唔鍾意嘅 7 月... 一定要打破慣例, 要 cheer up !!

喜事

恭喜橫丁, 賀喜橫丁 !! 希望有連鎖效應啦...

表白

諗番起情人節同 BB 講的真情表白, 真係錯哂... 執番身彩 !!

BB 講得啱 : 經一事, 長一智

哽住

自尋日 lunch time 開始就無哂心機, 哽住哽住, 連飯都食唔落... 好彩有人同我身同感受。乜我啲要求真係過高咩??

放工後同友人耍樂先至可以讓我稍稍釋懷, 依家都仲哽緊...

Batman Begins

終於都睇咗 "Batman Begins", 前段有啲悶, 但後段都幾好睇。

無論係主觀定客觀因素, 都係鍾意 Spiderman 多啲...

身有屎

好認同 KT... 身有屎, 好鬼好 !!

Attitude

友人忠告我要改變自己的 attitude; 否則, 機會將會逐一流失...

Sorry, 不嬲都唔走呢條路線, 做人一向好有原則 !!

應約

今晚終於應咗約, 感覺比預期中好, 都唔係好 odd 啫...

以前經常擔當發言人的角色, 估唔到今晚變成一個聆聽者, 又幾 OK 喎, 但好堅定唔會騷動...

身同感受

同 MY 通完電, 估唔到佢都身同感受... 好唔鍾意呢啲 scenario, 唔愛唔愛唔愛 !!!

其他人可能唔覺得係咩一回事, 但我真係好介意囉...

在意

根本就唔關我事, 點解會咁緊張同在意?? 呢次大獲嘞...

標美會

籌備多時的標標歡送會終於順利舉行, 好開心。終於見到久仰大名的何美鳳同傳聞好似 206 的 Crystal, 證明傳聞全屬虛構...

晏晝同 NY 攞住五枝拉炮、三個蛋糕、兩打乒乓波、一大張雀紙、仲有其他道具... 感覺似辦緊嫁妝, 好多嘢 !!

揀 WW 做 MC 確係明智之選, 無論係做 MC、玩遊戲、唱歌、跳舞、甚至玩骰盅都表現得好出色, 搶哂鏡 !! WW 金句 : "做人最緊要係囂張", 好鬼好。

點解我會 miss 咗 206 同 Bill 合唱個一 part 架, 據聞好精采架喎, 唔通我又失憶 !?

謎底終於揭盅, 希望 Bill 會鍾意我哋精心安排嘅節目同遊戲啦...

奏效

由於 KT 响上一次 MJP 實在係太囂張同神氣, 新三小花決定出絕招對付...

鮮紅 Maltesers 戰衣加人和招數果然好奏效, 自摸咗好多舖, 仲要 2 次 10 隻內食糊, 氣勢迫人, KT 後三圈剩係食咗舖尾糊, 輸到無哂籌碼, 好勁!! 但因為人和, 所以整個 MJP 都非常沉悶, 大家都好忍讓, 無得駁咀真係好辛苦呀...

MY 今次做咗 "另類炸蒸", 好慘...

Happy Friday

尋晚又成棚人去食飯睇戲, 《頭文字D》劇情麻麻, 但 "片" 車場面都幾刺激, 黃秋生依然出色。心情靚, 咩都好睇架啦...

飯局期間同久違了的肥哥哥通咗個電話, 雖然只係傾咗幾句, 但都好開心, 好耐無聽過人嗌 BB 做 "鮑魚" 啦, 好出色 !!

睇完戲去咗飲嘢, 大家討論爬山背囊前面條帶, Bill 話應該扣响 nipple 上面, 到底係企响度計定瞓响度計先, 好 confuse 喎... BB 諗嘢好有立體感 !!

好期待今晚的神秘活動, 尋晚有人差啲露咗口風, 實在係太大意啦 !!!

釘窿

終於都鼓起勇氣釘耳窿, 仲要一釘釘三個, 自己都覺得好厲害...

受死前仲要好似小朋友咁食 cone 雪糕定驚, 考慮咗成個鐘都猶豫不決, 總覺得釘嚟無乜意義, 又驚發炎, 下定決心只因 MY 一句 :「高興嘅時候可以帶呀嘛...」, 個樣好濕 !!

第一嘢竟然係釘耳骨, 痛到死, 再釘耳珠嘅時候已經無乜感覺。隻右耳紅哂, 雖則好痛, 但個樣依然鬆容...

唔可以打側瞓, 洗頭又要就住就住, 好唔慣。如我所料, 媽媽果然係最欣賞我耳骨嗰個窿, 真係好鬼開通 !!

無聊人

呢幾日响公司無所事事, 又整咗個公諸同好相薄, 今次嘅 Topic 係 "My Favourite Actors", 最鍾意係華仔個幾張 cover 相。

真係好鬼無聊, 我就係咁樣打發啲工作時間架啦...

認真

好耐都無試過咁認真去安排一件事, NY 確實係好 organized 同 efficient, 抵讚 !!

MY 都好好呀, 為咗我, 要你捱眼瞓, 真係唔好意思嘞...

麵包超人呀 !!

今晚响奧海城一間麵包舖, 竟然俾我見到麵包超人麵包呀!!! 新鮮出爐架, 入面仲有豆沙餡, 好鬼得意呀 !!!

"Siu Ki the Owl"

近排俾人質疑點解晚晚咁夜瞓, 個樣都仲可以咁精神...

實情係我玩緊嘅時候會好 energetic, 梗係要收埋瞓到成隻嘢嗰個樣啦...

突如其來

雖然只係 ICQ chatting, 但感覺依舊怪怪的... 熟悉的語氣、預計之內的答案、仲有突如其來的約會。

正如 KT 所講, 呢個約人食飯嘅籍口好無格調...

濕哂

今朝返工時候又落大雨, 倒水一樣, 有遮都無用, 對 converse 入哂水, 條褲濕到上膝頭 !!! 返到公司, 即刻借老板娘對拖鞋嚟著, 好鬼住家 feel...

好掛住太陽伯伯呀 !!!

王子的 message

今晚無啦啦收到王子的 offline message, 乜我唔係擺咗佢落 ignore list 架咩?? 成大半年無 contact 啦喎...

算罷啦, 今晚已經 add 番佢啦...

負離子民

實在係受不了自己把又厚又曲嘅頭髮, 今日決定做番個負離子民。

明明話修吓後面啲頭髮之嘛, 做咩又同我剪短前面啲頭髮呀 !!! 係咪玩我呀, 我留得好辛苦架...鳴鳴鳴...

Happy Saturday

尋日放工後, 立即相約好友們耍樂, 先飲茶, 後 MJ, 夜晚再同人慶祝生日, 好鬼充實...

KT 為咗克制我, 竟然用個橙嚟嚇我, 好嗱喳 !! 响呢個組合之下, KT 都無輸錢, 證明呢招好奏效... 發現自己真係好善忘, 完全唔記得自己有見過人妻 J 張帖, 諗咗 3 個幾鐘都諗唔到, 感覺好可怕 !!!

MJ 後, 趕頭趕命去買禮物, 正躊躇唔知去邊度包禮物之際, 竟然發現間新疆菜館為咗慶祝 3 週年, 每枱都會有一份包得好靚嘅神秘禮物, 啦啦聲放埋支香水入去, 真係好鬼勁 !!!

尋晚係自 WW 返新工後第一次見佢, 發脹咗好多, 仲同 KT 比併手臂添... 身為一個 PR, WW 果然可以 "一輪咀咁講嘢, 但又可以保持儀態", 抵佢咁鬼囂張...

晚飯後, 又來了 12 round MJ, 懷疑 KT 出咗邪術, 無理由可以食出清一色兼自摸十三么, 好過份 !! 知道自己神智不清, 於是打醒十二份精神, 以防小炸蒸現形...

騎呢病房

唔知點解, 護士 KM 所駐守的病房特別多騎呢事發生...

話說有個 houseman 半夜竟然大鬧病房, 唔單止掃哂藥車啲嘢落哋, 仲夠膽死用大大塊嘅藥水膠布封住呀婆個咀 !!! 過份咗, 但好好笑...

海鮮夜

今晚去咗 NY 推介的飯店食海鮮, 癩尿蝦同蟶子真係好好味, 最遜色係個薑蔥炒蟹, 個人認為太多薑蔥啦...

懷疑係因為唔收開瓶費嘅關係, CC 帶咗兩枝紅酒去飲, 顯得有啲格格不入。最估唔到係 206 原來可以咁豪、咁大膽, 勁 !!!

飯局期間, 無啦啦提起中學時代的三大絕招 : "拍胸掌"、"絕子絕孫斬" 同 "孽種拳", 本人最耍家始終都係 "絕子絕孫斬"。到底咩係 "嘩啦嘩啦稻草人" 呢?? 勞煩搵人幫我問吓 HH, 真係好想知...

當 MY 食緊薑蔥炒蟹期間, 送上精心炮製的 "金樽", 但 MY 好似有啲介意。呢個小玩意係我哋三個好俾心機整架, 連個樽底都有 design 架, 希望 MY 高抬貴手, 唔好毀咗個 "金樽" 呀...

好希望 NY 下次一發現唔對路, 就即刻撩我講嘢, 以免不必要的尷尬場面。

近期新聞

飯局前, 去咗葵芳會合 NY, 問及佢個呀姐上唔上鏡, 語帶相關, NY 兩樣都答哂, 好鬼好...

提到近期嘅新聞, 就梗係講緊 Michael Jackson 啦, 唔通 Donald Tsang 咩... 明明係報外電架嘛 !!!

久違了的...

原來同 hallmate 44 已經成 4 個月無見啦, 對上一次見面係年初三...

前幾日從橫丁口中先知原來呢位久違了的朋友去咗加拿大。換轉係以前, 應該一早就通知咗我, 仲可能要求送機添...

前晚收到佢的 MSN 問我個英文地址, 唔知點解, 嗰一刻感覺怪怪的... 睇番自己個網上相薄, 發現 44 好耐都無出現過...

我諗, 係時候要改變自己的態度...

甘拜下風

睇完戲同 KT 來了一個短聚, 不得不佩服 KT 的無聊小玩意及語文修養, 實在係甘拜下風。

乾蒸精 + 酥騷蒸 + 小炸蒸 = 三蒸

身為一個 solicitor, 點解可以諗埋啲咁無聊嘅嘢?? 雖則我好愛...

失望

啱啱睇完 Mr & Mrs Smith, 可能之前期望過高, 覺得有少少失望。Brad Pitt 俾 Angelina 搶哂鏡, 唉...

附近嘅人似乎都睇得好開心, 睇到笑哂, 但我真係笑唔出, 仲覺得有啲胡鬧, 睇到中段仲有少少 "恰" 眼瞓添。NY 睇第二次真係好好...

Thanks

多得各方好友鼎力相助, 終於都儲齊 "麥嘜串起你" 襟章啦...好鬼靚呀 !!

珀麗灣之旅

又去打攪 CC 的新居, 比兩星期前更似新屋入伙, 到處都封哂塵, 最嗱喳嘅係竟然無廁所用... 唯有成棚人去 club house 借廁所, 好彩大家都無肚痾啫...

送咗副木製嘅 Deluxe 版 Scrabble 俾 CC, 係可以供大家分享嘅新居入伙禮物, 一舉兩得, 好鬼好。

因為講錯咗個層數, 無啦啦硬食咗兩句粗口, 隻肥鬼好無禮貌呀, 心情唔好大哂呀? 搵我嚟出氣... 好嬲呀 !!! 整晚心情大起大落, 多得 MY 的支持同鼓勵, 決定加油加油 fighting...

發現 NY 真係太醒目兼太好記性, 起初打算殺佢滅口, 但同 MY 商量後, 決定留佢活口, 招攬佢成為 "新三小花", 恭喜哂 !!!!!

小炸蒸

行完山, 做完節, 利用僅餘嘅力氣去 KT 家 MJ。期間多次靈魂出竅, 頭腦遲鈍, 仲食咗一舖詐糊, 仲係好詐個隻, 結果被冠以 "小炸蒸" 之名, 好好聽...

相比起 NY 的 "卑鄙小子", KT 的 "小炸蒸" 實在係高班好多倍... NY 的口技仍然有待改進。

某君的 "乾"; MY 的 "酥"; 本人的 "炸"; 三人加埋就係 "乾酥炸", 好到極 !!!

P.S. 等緊 MY 提交 "乾蒸燒賣" 報告, 快 !!

大澳行山記

端午佳節, 一行 17 人去咗行山, 烈日當空之下, 由深屈道行去觀音山同靈會山, 目的地係大澳。上到第二個山頭時, 茶少响背囊攞出兩罐冰凍嘅紅毛丹, 實在係照顧周到...

沿途見到一碌刻咗 "蟻行者 - Ant's Walker" 嘅石柱, 好鬼 creative !!!

完成 4 個鐘頭上山落斜嘅路程, 兩邊膊頭曬得更燶, 兩條腿攰到軟弱無力...

Family Night

成個禮拜都無返過屋企食飯, 今晚決定推哂所有約會, 做個乖乖女。

為咗隆重其事, 媽媽準備咗我最愛嘅蟹粥, 比尋晚响 "池記" 食嘅蟹粥好味好多呀 !!!

旺角街頭

頻頻撲撲的一晚...

幸好最終都下定決心, 還有意外收獲, 好鬼好 !!

乾精

KT 又一出色之作 : 乾精。

佢竟然形容某君為 "乾精", 好過份...仲抵賴話自己其實想講 "乾蒸燒賣"...下流之極。

鼓舞

尋晚聽到啲好鼓舞嘅說話, 歡欣到傻咗...

已經盡量 hold 住自己嘅情緒架啦...

抱擁這分鐘

食完 buffet 諗住約 NY 睇《抱擁這分鐘》, 咁橋原來 BB 買咗同一場嘅戲飛, 於是諗住 4 個人一齊去睇。但最終兩個男伴都病倒放飛機, 最後得我同 BB 兩個去睇, 大家都無諗過今晚會同對方睇戲, 好好...

之前 KM 同我講話佢睇呢套戲個陣時由頭喊到落尾, 出名冷漠嘅 KM 竟然哭成淚人, 好緊要架喎... 睇完套戲, 無想像中咁好睇, 雖則有啲位係幾 "腰" 心, 但未至於感動到喊囉, 真係好難去投入個故事情節 !!

一見到個男主角就覺得好熟面口, 睇睇吓, 好鬼似 Nobu san 呀...大家都係咁不修邊幅。

Buffet

今晚 fairwell 同事 V, 去咗富豪酒店食 buffet。往酒店途中, 迎面而來一個高大型男, 即刻望多兩眼, 睇真啲, 原來係呀 Deep 嚟架, 真人型過上鏡 6 倍呀, 即時胃口大增 !!

雖然 buffet 啲嘢食好一般, 但都有食到想扣喉嘅感覺...

誠懇

好耐都無聽過咁誠懇嘅道歉...實情係根本就嬲唔落...

發覺自己真係好偏心, 如果換轉係第二個, 一早就黑咗面啦...

誤導

不嬲都覺得隱瞞係好好玩, 好刺激...

近排發現原來誤導仲好玩...

呵呵呵...

雖然有少少阻滯, 但都俾 MY 估中, 今日的確係好歡欣 !! 好耐都無試過由個心度笑出來, 感覺就好似知道 "邊次" 會同我哋一齊去珠峰一樣...

尋晚的不快事統統拋諸腦後...

蝕哂

避無可避, 今晚終於要同個紐西蘭客食飯...蝕哂呀, 蝕哂呀 !!!

明明講咗話响 lobby 等, 無啦啦又要人上佢間房, 無計可施之下, 唯有致電同事 J 求救, 但一啲都幫唔到我...一見到佢就俾佢攬住兼左右咀臉, 即時成個人亂咗, 仲要死頂扮大方...

唔好以為送隻手鐲同古古力俾我就可以亂嚟, 又掃我背, 又叫我落 bar, 又想灌我飲酒...想死呀 !! 即刻話自己之後約咗人, 同埋身體唔好, 唔可以飲酒。飯局期間, 佢竟然話我係佢其中一道 dishes, 實在下流得好緊要 !!!

臨走前仲要咀多兩嘢, 蝕呀, 蝕呀, 蝕呀... 走咗之後仲夠膽死 send SMS 再約我, 痴哂線呀 !!!!!!

為咗填補心靈上的創傷, 今晚忍唔住做咗一件大膽事逗自己開心...

城城演唱會

尋晚又過了一個好歡欣的晚上...

一行五人相約去睇城城 "飛越舞林" 演唱會, 結果四個人遲大到, 害 MY 要响尖東呆等成個鐘, 好過份 !! 但 MY 一見到我, 就立即怒氣全消, 嬲唔落啦啩...

演唱會啲飛係 BB 同我哋買, 佢仲話幫我哋揀個正面位, 結果係對到正小美同城城個 pat pat , 係咪玩嘢呀?? 充當演唱會 Cam Man 的 NY 成晚都剩係影到城城個背脊, 有相為証架 !!

由於大家都唔係城城 fans, 難免覺得個 concert 有啲悶, 唯有互拍自娛... 最高興係當城城懶感性咁講嘢個陣, 竟然有人大嗌 "除衫", 好鬼正。

Concert 還算好睇 , 雖然城城唱快歌有少少甩咀, 但跳舞就真係好好睇, 最鍾意係佢個 "燈膽機械人" look 同 "半裸蠍子人" look, 型到爆 !!!

Extra Bonus : 無啦啦响尖東見到我個囡同 PP; 仲有, 三更半夜食咗一大兜好好味嘅格格薯...

昆蟲

拒絕了莊友 A 的影昆蟲活動, 枉費咗佢一片苦心, 大人有大量, 下次一定唔會爽約。

剛剛收到莊友 A 的電話, 佢話今日風和日麗, 唔去嘥哂喎, 起初都有少少後悔無去, 但當我知道除咗蝴蝶同蜻蜓之外, 原來仲有四腳蛇、蜈蚣、毛毛蟲...

我最驚四腳蛇架嘛, 好彩無去啫, 如果唔係一定會手震到影唔到相 !!!

懶洋洋

好耐都無試過享受一個懶洋洋的星期日早上。

扭開收音機, 聽到陳奕迅的新歌《呀牛》, 同《夕陽無限好》一樣, 唔好聽...好懷念華星時代的陳奕迅, 忍唔住要聽番我最鍾意的專輯 - 《我的快樂時代》。

好期待今晚的郭富城演唱會...

6月4日

過了一個絞肚子的早上...

匿埋咗响廁所成半個鐘, 好死痛...搽完藥油, 堅持返工。

懷疑肚痾嘅主因係因為用咗夾生嘢 (仲要係鵝腸) 嗰對公筷食嘢, 好嗱喳!!

6月3日

過了一個好歡欣的晚上...

唯一美中不足係 BB 部 DV 機竟然夠膽死無電...離哂譜 !!!

教養

終於約到工作繁忙的 PP 食飯。

初次見到 NY 的新髮型, PP 竟然可以沉得住氣, 仲有禮地報以一個微笑, 真係好有教養...佢仲夠膽死話 NY gel 咗個碧咸型仔雞冠頭, 過份咗...

由於尋晚個餐食得太齋, 於是今晚愛咗好多肉食, 好飽肚。相約好三人的下一次活動係穿耳窿, 好緊張, 手心冒汗...

今晚發現 NY 的轉數慢咗好多, 建議多啲同 KT 切磋口技...

悠長假期

唔經唔覺响呢間公司做咗年半有多, 每日返工都好悠閒, 做自己嘢多過做公司嘢, 感覺放咗一個悠長假期...

中午同同事 J 撐枱腳食飯, J 都好佩服我點解可以留响呢間公司做咁耐, 好應該趁後生出去學多啲嘢、睇多啲嘢...絕對認同。但屋企人同身邊的朋友都眼紅我呢份工, 叫我打死都唔好 quit...好矛盾...

預計悠長假期會放到出年農曆新年, 我諗應該係極限。

嘥咗

今晚同 NY 傾咗成晚, 估唔到佢嘅忍耐力係咁驚人, 咁無理嘅要求都 fulfill 到, 好厲害...

同 HH 的感情無疾而終, 確係嘥咗...如果當時沉得住氣, 結局應該會唔同。冇辦法, 唯有汲取教訓, 下次一定會 handle 得好啲...

重溫了當年的嗱喳事件, 依然覺得心寒...

莊友 K

久違了的莊友 K 竟然 random search 到我個網上相薄, 仲留咗以下 comments :

"大家跟以前一樣, 只是欠了我的份兒! :( "

死, 好尷尬, 點回覆好?? 莊友 C 覺得突然約番佢又好似好專登咁...

咁點呀?? 不了了之呀??