Facial House

美容院張床真係好舒服, 連唧緊黑頭、修緊眉毛都可以呼呼大睡。

最尷尬的一次是在倒模前, 矇矇矓矓有人同我講 : 「小姐, 合埋個口先啦...」

春．夏．秋．冬

近排狂煲的專輯。

最喜歡是 "偷故事的人" & "隨你"。

大凶日

點了兩道不好吃的甜品, 破壞了原本美妙的飯局;

在尖沙咀街頭碰上被爽約的舊同事;

走遍油尖旺都買不到心頭好, 很氣餒;

到 "仙跡岩" 飲嘢, 赫然發現坐在隔離的歐巴桑拿出一大袋橙即切即食, 頓時面如死灰;

回到家中, 如常把手機放在床尾的層板上, 仔細看看, 整塊板都發了霉, 雪白的手機亦黏了不少綠色霉霉, 即時毛管戙!!!

Todai again

又去 Todai, 相信今期主題係 "香橙 & friends", 不妙之極!!

"香橙牛肉卷"、"香橙西米布丁"、"香橙雲喱拿梳乎厘"、"香橙鴨胸"; 日本前菜全用紅柚伴碟; salad bar 出現 "意式香橙沙律醬" (還以為是至愛的蛋黃醬, 差啲賴嘢); 連雜果 mousse 都放上幾片橙, 非常不妙!!!

KT 講得啱, 真係無大蝦供應, 為了彌補損失, 連不太妙的 "芝士焗龍蝦" 都食了 3 round...

諸事不順

一心諗住三條友食飯聚舊, 但無嗱嗱變咗為數十人的艾力 fairwell party!!

Sorry, 唯有爽約。

肥同事

新同事今日上班, 由依家開始, 會有個小肥佬坐我隔離, 好有壓迫感。

強烈要求間 partition!!!

S9500

影 wide shot 得, 影 macro 亦得, 愛死。

妙蓮

睇《飲食男女》得知南生圍有一個巨型蓮花池, 於是相約 WC 前往拍照。

約好兩點三在元朗等, 但三點仍未見 WC 蹤影, 原來搭錯車去了天水圍, 仲要轉乘慢過蝸牛的輕鐵返元朗, 不妙之極!!

四點鐘才到達目的地, 因為農場位置偏僻、交通不便, 所以只有小貓三幾隻。沿著池塘邊行邊拍, 差不多一小時才走完一圈。烈日當空, 汗流浹背, 唯有躲入有瓦遮頭的地方避一避, 還順便品嚐了農場豆腐花, 糖水有少少薑味, 味道不錯。

除了影妙蓮, 還拍了日落照, 邊餵蚊邊等日落, 等了半個鐘終於見到咸蛋黃, lucky!!

敬輝農場真是個拍照的好地方。

黑面

美好心情一朝早給破壞, 次次有事都要我去補鑊!!!!!

真係好想大叫呀~~~

史力加

四個八婆相約飯局, 足足傾了三個鐘。

原來舊同事 V 一直暗啞底稱同事祖為 "史力加", 雖則好無品, 但又真係好貼切喎!!

MPF II

剛剛打去 HSBC, 原來舊公司份 MPF 增長了 53%, current 公司嗰份亦有 18% 增長。

同事們都話我有眼光, 其實我亂揀架咋...

煲碟

近排晚晚煲碟, 一對熊貓眼現哂形...

《霍元甲》-
睇第二次都覺得好精彩, 順呀姐要求, 今次睇了廣東話版, 配音還算不俗。

《Fantastic 4》-
一早預咗係爛片, 但比想像中還要爛, 演員、特技、情節都唔 OK。

《死神再 3 來了》-
橋段和第一集如出一轍, 雖然新鮮感欠奉, 但精心設計的 "奪命" 場面確實震撼, 夜晚晚自己一個睇都幾驚。

《殺破狼》-
極力推介, 本人認為是 05 年最好看的港產片, 比嗰套所謂的 "最佳電影" 好看十倍, 不得不對葉偉信另眼相看。

全套戲拍得非常緊湊, 尤其是最後一場打鬥戲, 真係緊張到心都跳埋出來。六位男角表現出色, 入型入格, 睇完都不停 recall 啲情節, 感覺就好似當年睇完《無間道》一樣。

以前覺得甄子丹型, 依家覺得佢型到爆。

長頸族

睇完無線介紹長頸族的節目, 呀姐無無謂謂咁攞住把軟尺度頸長, 我頸長 3.5", 媽媽只得 1.5", 唔怪得未見過媽媽著樽領衫啦。

MPF

發現上一份工的 MPF 已增長了差不多 40%, 好勁啊!!

郊遊

復活節假期最後一日, 去了大帽山 BBQ, 天高氣爽, 真好。

可惜唔夠時間行山, 下次一定要早點出發。

復活節

過了清明個幾星期才去拜呀婆, 實在少有。還好, 唔駛同人迫。

夜晚去了食店林立的黃埔晚飯, 千挑萬選, 選了 "鼎泰豐", 味道一般, 還不及 "翡翠拉麵小籠包", 真的是名氣大於一切。

估唔到有男孩子的嗜好會是 "打 X 機" (還以為只是打機), 仲要破世界紀錄 - 3 小時打 7 次!!

嗱喳

係, 我認我唔鍾意傾正經嘢, 都係同我講嗱喳嘢罷啦!!

正經嘢聽唔入耳架~~

極地雪犬

差不多落畫才去睇《極地雪犬》。

5 點 7 開場, 但 5 點 3 還在佐敦食緊杏汁燉蛋, 匆匆忙忙趕去 apm, 點知一上橋就塞車。去到 apm, 架電梯慢過蝸牛, 結果 5 點 10 先入到場, 激氣!!

今次影評無介紹錯, 套戲真係幾好睇。感人得嚟又唔煽情, 雖然唔喜愛犬類, 但都看得很投入。加上男主角高大靚仔, 真的賞心悅目。

睇完戲, 在 apm 逛了一圈, 看了一陣王力宏簽唱會, 便移師陣地, 去了九龍城食泰國菜。

還有 follow-up? 唔好啦啩... 忘記帶 con case 是拒絕過夜的其中一個好藉口。

掃興

因天雨關係, 明天的郊遊節目取消, 真掃興!!!

板前

一直好想去 "板前" 食壽司, 但次次見到咁多人等位, 便打退堂鼓。今晚有人攞定位, 真好。

My itamae favourite : 帆立貝壽司、燒鰻魚壽司 & 炸墨魚軟骨。

Working Holiday

有股衝勁想參加 "Working Holiday Scheme", 澳洲、紐西蘭、愛爾蘭, 三個國家都想去, 首選愛爾蘭。

仲有 3 年時間俾我考慮, 如果有半年 scheme 就好啦~~

祝福

好幾天沒有跟好友通電, 暗暗覺得不對勁, 果然...

掛線前的一句話 :「珍惜眼前人。」老土但發自真心...

願心情早日平伏。

Maggi生日會

因為 MY 生日, 中午可以明來 TWMJ, 都係覺得偷偷摸摸好玩啲。輸小姐為了保住名聲, 臨尾都要輸一舖俾 MY, 果然並非浪得虛名。

夜晚去了 KT 胞弟推介的小館晚飯, 小菜還算 OK, 但海鮮真的不妙, 相信 KT 胞弟的生日基金將會被扣起...

弱BB

"如果你話你喜歡我幫你按摩, 我諗我幫唔到你囉, 朋友咁 close 唔係幾好嘅;
但係如果你話你喜歡我, 大家嘅關係唔同咗, 互相按摩都好正常嘅..."

自問真係講唔出口!!!

Family Day

因為二姐生日, 所以星期六無去攀石, 全日都係 family day。

呀姐的村屋已經成為岑家的假日開 P 私竇, 環境寬敞、空氣清新, 但要忍受蚊叮蟲咬。

尖東

又去了尖東影夜景。因為忘記叉電, 只能拍得數張, 但不打緊, 反正上次已拍得很盡慶。

繼 IFC 五樓平台後, 發現原來藝術中心二樓亦是影維港夜景和偷情的好地方...

雞子

睇完戲去了 "六鼎記" 打邊爐, 與 44 爭拗到底雞子是甚麼內臟。

我話雞子係睪丸, 佢話係雞腎, 我即時反駁 :「你都痴線架, 如果雞子係腎, 咁雞腎算係咩呀? 」

今朝查閱網上資料, 發覺原來錯哂... "雞子" 竟然係公雞的腎!! "雞腎" 竟然係雞的胃!!

唔係呀嘛!?

本能 2

不理 44 反對, 堅持要睇《本能 2》。劇情還算懸疑緊湊, 但心理評估的那一小段實在悶, 忍不住恰著了。48 歲的 Sharon Stone 真的 keep 得好好, 依然風韻猶存, 男主角真的給比了下去。

若果可以再揀, 我寧願睇《極地雪犬》。《至尊無賴》? 唔係啩!?

人魚朵朵

雖然未必會去睇呢套戲, 但張 poster 實在美麗吸引。

My Andy

告吹

噚晚未夠十二點就上床瞓覺, 準備今朝一早起身郊遊。一開手機就收到 KK 抱恙的 SMS, 活動告吹...

好耐無試過放假都咁早起身, 今朝做咩好呢?

回憶

某些往事, 真的記不起來...

到底是善忙、記憶力差、還是選擇性地 delete 某些不快的回憶呢?

放工前一個鐘

17:00 - 終於出三月份的糧。

17:10 - 同事 K 因為無人工加, 怒氣沖沖。

17:15 - 上星期話辭職的同事 M 突然宣佈 :「我都係唔走住嘞, 再做多一段日子先, 依家未係時候。」

17:25 - 同事祖與老板娘吵大鑊, 差點兒大打出手。

18:00 - 同事 K 嬲到連電腦都唔熄就走咗。

若果我係老闆, 呢三位仁兄, 我一早炒咗嘞!!! 老闆/老板娘真仁慈...

呵呵呵...

好開心呀, 加咗 9% 人工!!!

若果按工作量和工作時間計算, 我應該算是高薪一族。

我的同事

同事偉 : 老闆的細佬, 為人自私, 智商只得八歲, 但經常講粗口罵人。
同事祖 : 猿人相, 相信還未完全進化, 是典型的臭八婆。
同事 M : 脾氣古怪的基督徒, 經常想和我討論人生哲理 (通常會扮忙), 行為騎呢。
同事 K : 工作能力及領悟力奇低, 為人得過且過, 是一個年近四十的老姑婆。
同事 L : 典型自閉仔, 可以一整天不和人交談, 是一個神秘的中年男人。
同事 W : 轉數極慢 (嚴重時甚至停頓), 經常大驚小怪, 是一隻井底蛙。
同事豬 : 唯一和我合得來的同事, 為人醒目, 但工作繁忙, 無時間理我。

我份工樣樣都好, 最唔好就係班同事...

Climbing II

噚晚又去了攀石, 但手軟腳軟, 總覺得好似踩唔實舊石咁, 好驚... 好彩 belayer 夠大隻扯得住。

結果, 不小心 fall 了一小段, 又刮花了一對膝頭。

無間道

一看再看, 依然覺得精彩緊湊...

這是唯一一部令我步出戲院, 立即想買飛看下一場次的電影。

送給好友的