東華

好快就到一年一度的 "歡樂滿東華", 又係時間唱番首 "Camilla 雙下巴"...

X'mas 就梗係唱 "媽媽生" 啦...

零食新寵

卡樂 B 新出了芝士火鍋薯片, 好香芝士味, 仲有少少酒味, 真係好正呀!!!

可惜唔係度度有得買...

Birthday Gift

26 歲生日禮物大哂冷!!!

濕身日

約咗三個幾月先約到班莊友去海洋公園, 但紿終都係唔齊人。

今日玩滑浪飛船, 水流好似特別急, 坐中間位都濕哂, 有無搞錯呀!! 年紀愈大, 愈唔夠膽玩機動遊戲, 以前玩海盜船可以坐最高嗰排, 但依家坐中間嗰排都已經好驚...

夜晚諗住去歌賦街食飯, 點知兩間心水餐廳都無開, 唯有下一站天后。响 Ironwood 食完正餐, 再去大坑道食 cake, 點知倒瀉杯水, 條褲又濕過...

P.S. 今日又撞到 Esther, 發現久唔久就會撞到佢喎, 有無咁橋呀!?

BBQ 生日會

去完親子旅行已經攰到死, 夜晚仲去 BBQ 慶祝我同 KK 的生日。

BB 挑選的 Adidas 波鞋雖然唔係我最愛的南瓜頭款, 但都幾靚喎。打開個鞋盒, 見到 BB 的證件相, 真係嚇咗一跳, 最邪係有 BB 呀姐張證件相!!!

尷尬家長日

今日代呀姐做家長, 要請半日假帶咪咪去幼稚園的秋季旅行。

晨早六點半起身去接咪咪, 第一眼見到佢就覺得自己撞鬼, 我竟然著住一件同卓思幼稚園校服有九成相似的藍色衫, 其他家長實以為我專登襯絕架啦!!!!! 入到班房, 老師劈頭第一句就話 :「嘩, 媽媽好後生喎!!」真係發佢個瘟...

去到荔枝山莊, 一面忙於照顧咪咪, 一面要同其他家長打交道。個個家長都話我同咪咪好似樣, 十足十餅印一樣, 唯有一而再, 再而三強調我只係咪咪呀姨, 好尷尬...

最頂癮係俾咪咪捉咗我出去玩親子遊戲, 矇住對眼嘅我剩係聽到班老師嗌 :「咪咪, 捉住媽媽隻手啦, 捉住媽媽隻手啦...」搞到我心都亂埋, 結果包尾而回。相信部 view cam 一定係咁影住我...

生日飯

今晚又來生日飯, 去了銅鑼灣的 "阿拉丁咖喱屋", 地點僻靜、咖喱又好味、仲緊要係有電視睇《胭脂水粉》大結局, 茶少果然無介紹錯!!

今晚從橫丁口中得知一件荒淫事, 實在係太淫亂, 唔怪得之唔講俾我聽啦...

頂

連老細同老板娘都走埋, 今日要一頂四, 有冇搞錯呀!!!

生老病死

生老病死, 一下子湧埋嚟...

不一樣

同樣係每日收到 SMS, 感覺卻不一樣...

......

原來人真係可以咁兒戲, 完全意料之外...

有少少毛骨悚然...

忙

同事 J 又放大假, 搞到我一腳踢...

好耐無試過朝九晚六都只係做公司嘢!!

生日 SMS

今年收到一個好無格調的生日 SMS :

小琪今年二十六, 身材愈嚟愈成熟;
下年就到二十七, 行得走得又砌得。

點解咁似 "男極圈" 嗰啲咸濕打油詩!?

It's my day!!

今年正日生日同屋企人慶祝, 又係競食大賽咁, 當然有我最愛的 blueberry cheese cake 啦!!

Tea time 仲約了 BB 同 MY 玩 Spelldown, 點知俾經理 "趕"。啍, 好巴閉咩, 我下次去第二間 Double Star Cafe 玩...

"喇甩"

今晚去了 KM 精心挑選的 "喇甩" 餐廳食飯, 個名真係好騎呢!! 最衰間餐廳無電視, 無得睇台慶添...

有新耳環同香水, 真好...

愈想愈無謂

無得 download 新歌, 唯有聽番啲陳年舊歌, 呢期最愛 Eason 的 "愈想愈無謂"。

乜首歌好冷門咩!? 竟然好多人都未聽過... Eason "woo" 得好好聽架!!

傻豹

又有人話我肥咗呀!!!! 無辦法啦, 呢排係咁食食食, 唉...

今晚去了久仰大名的 "橋底辣蟹" 食海鮮, 隻蟹成三斤重, 差唔多我自己一個食哂, 攞明谷肥我啫! 都係九記的海鮮好味啲。

收到一件桃紅色外套, 會唔會 cutie 咗啲呢!? 成隻傻豹咁...

女人的秘密

日本雜誌《 SPA!》訪問了二百名女性, 當中一成自爆會吃鼻屎, 有人更吃上癮。「我想過戒吃鼻屎, 但實在做不到。」二十四歲的辦公室女郎說。

更可怖的是, 四分一人承認成年後試過至少一次 "賴屎", 同樣人數試過大解後不洗手。

-- 11月18日蘋果日報《世界萬象》

發火

又係佢, 又係佢!! 搞到我同橫丁無名火起, 小小事之嘛, 到底煩夠未呀!?

大時大節唔好要我發火, 已經盡量 hold 住自己嘅情緒...

1st Gift

今年收到的第一份生日禮物, 係我好歡喜的 Playboy 兔子巾巾, 好襯我呀!! Yeah~~

柏金遜

今晚最後一個離開公司, 走嘅時候硬係覺得唔聚財, 好似漏咗嘢咁, check 吓自己個袋, 手機、銀包、化妝袋全部拎齊, 應該係自己諗得太多...

差唔多去到深水埗, 突然醒起原來唔記得熄燈、鎖門、lock 密碼!!! 唯有搭倒頭車折返公司, 仲要俾 "實 Q" 發現添... 柏金遜症日益嚴重!!

小熊維尼

好鍾意嗰張 "肚腩版小熊維尼" 相片, 引述 John : "小熊維尼係我抓緊肚腩男最 cute 一瞬間影的"...

啲 caption 真係無得頂, 妙死!!!

b420

不嬲以為《b420》只係解 "before twenty", 原來仲可以解 "before too old"。

又想入戲院睇添, 但呢排好似睇得太多戲...

冷淡

上莊結婚, 莊友們反應冷淡, 一早預咗, 但唔好猶豫不決嘛...

結果豬達單拖赴會, 型!!

筆名

近排無無聊聊, 睇了 MY 送的 "工具書", 最好睇係林超榮寫的序, 同埋最後頁的新書推介。

真係頂唔順個筆名, 無格調之極, 用番真名仲好啦...

BBQ Party

今日 join 了 KK 和呀信搞的 BBQ Party, 呀信女友真係好靚, 成個後生版李若彤, 唔怪得之叫 "姑姑" 啦...

去到咁僻的地方燒嘢食都撞到人, 仲要係我同 KM 都好討厭的中學同學, 兜口兜面咁撞到佢, 想扮見唔到都唔得, 真係撞哂鬼!!

全晚高潮係玩 "心臟病", KM 真係笑爆咀, 好彩最後反敗為勝, 唔駛好似 KK 咁喪嗌 "昭音音"。

P.S. 玩 hand killer 盡量唔好十指緊扣, 好難傳 signal 架...

Proof + NaNa

好耐無試過一日睇兩套戲, 仲要係同一間戲院添。

《Proof》簡直係悶戲一場, 啲劇情慢到暈, 中段睇到瞓著咗, 好彩係免費首映飛!!

《NaNa》故事一般, 偶爾會有啲笑位, 首主題曲幾悅耳, 相比起《Proof》, 已經算好好睇嘞!!

睇完戲由太古城行去西灣河, 途中偶到 HH, 有少少不知所措, 同佢寒暄咗幾句, 之後繼續尋找平價 Maltesers...

意大利

依家問番我當年去意大利的旅行路線, 鬼記得咩, 6年前嘅事啦!!

剩係記得雪糕好好味、pizza 好鬼平、同埋 gondola 個船夫好型仔...

P.S. 有個三姑竟然問人借個 6L 背囊, 少咗個 "0" 喎, 離哂譜!!

絞

噚晚嗰餐一定好唔乾淨, 半夜個肚絞住痛, 痛足成個鐘...

懷疑元凶係碟蜆!!!

Corpse Bride

差不多落畫先至走去睇《怪誕屍新娘》, 最鍾意呢啲古靈精怪嘅戲, 最衰知道個結局, 少了份驚喜。

想睇多次《怪誕城之夜》...

走唔甩

查實真係樣樣都好喎, 如果佢大隻啲、靚仔啲, 一定唔走甩...

Holiday Mood

同事們輪住放假, 成間公司充滿 holiday mood, 最妙係連老細都係咁, 真係撞鬼!!

舊曆

今年竟然無人記得我舊曆生日呀!!! 原來已經過咗成個禮拜, 連自己都唔知...

"腰"

噚晚同 PK 暢談了個幾鐘, 句句都 "腰" 心 "腰" 肺, 真係好唔夾...

義工

近排無啦啦做咗翻譯義工, 算罷啦, 甘心情願...

友情價 = $0 , 有無咁著數呀!?

Last chance

係唔服氣架啦, 點都要再試一次!!

Why?

都已經 11月架啦, 點解仲係著緊短袖衫?
明明已經瞓得好多, 點解仲係咁眼瞓? 對眼仲係咁腫?
每次聽孫燕姿啲歌, 點解都會覺得好爽?
去完旅行無耐, 點解又有 "好想行開吓" 的感覺?
Hallmate PK 份人咁靠唔住, 點解佢啲搭羅牌占卜會咁準?

妙蓮

又係 TWMJP, 但今晚不在狀態, 做咗大輸家, 真係妙蓮...

玩死

真係俾班莊友玩死, 由八月開始約去海洋公園, 約到依家都未約掂, 明明擇哂日架嘛, 啲人又要臨時放飛機, 真係激死我啦!!!

再放飛機嘅話, 我真係咬人架!!!!!

又食

今晚又去九記食海鮮, 正如 KM 所講, 再咁食落去, 膽固醇一定會超標...

唔公平

點解呀姐去啤酒節個晚啲氣氛咁好架? 個個除哂鞋咁跳, 仲爆場添, 唔公平呀!!!!!

孤獨精

今晚無啦啦做咗孤獨精, 真係激死我啦!!

尖咀行

原來真係好耐無去尖咀行街, 金馬侖道間滙豐幾時裝修好架? 新港間無印幾時摺埋架? Out 哂...

今晚發現自己真係好唔鍾意食日本拉麵, 明明好餓架嘛, 但都食剩大半碗...

P.S. 今晚有人話我個樣好 "潤", 真係咩!?

TWMJP

噚晚又來了一場 TWMJP, 後四圈打足三個鐘, 有個邪人竟然莊連五, 結果打到 12 點幾。之後仲死去發記食宵夜, 最終搞到成 3 點先瞓, 好彩今朝仲知醒起身返工。

好耐無同美女 MJ, 依然 "碰" 得好清脆, 好鍾意佢猜輸, 真係無夾埋架...

曝光

去啤酒節啲相俾人 upload 咗去 Bierfest 個 homepage 呀!!

Login : siuki
Password : tjahh54k

兔女郎個張真係好妙架~~

Bierfest

第三年去啤酒節, 諗住 Halloween 實會有特別節目, 點知一如以往, 仲少咗兩個遊戲玩添, 無得俾 BB 一展騎功。而且人又少, 氣氛唔夠熱鬧, 好彩有個 "正" 爆兔女郎艷壓全場, 仲提供埋餘興節目添!!

每年總會有人負責看袋, 估唔到今年竟然係 "李鵬", BB 成日都帶埋啲唔啱咀型的朋友來, 但自己又剩係掛住玩, 好過份!!